Inlarna Ropui lo

(He thil hi ka ziahna a rei deuh tawh, a original a bo daih, Lengzem a mi hi dah hmiah ang)

Ka no chu ka’n tlâk pap a. Eng nge an telh ka hre lo, lem rualin lu a hai nghal chuai chuai mai. Excise hlau reng renga chawltuiningzu dawn thin ka ni a; in neitunu lah chuan tlâk zawh ruala chhuak nghal turin min lo tur sek bawk si a, a kuang pawh awm lovin pawnah ka petek chhuak ta nghal a. Hmeithai inah chuan ka thu zawk emaw ka tih hlanin ni dang ang bawkin khua a lo tlai leh hman tawh pek a, pawn lam khua chu a lo thim fu tawh mai a. Kawmkara thil filawr ka hmuh apiang vuan chungin, kawngpui panna step chu ar khawthim dai tak meuh meuhin ka’n hel nuai chho ta a. Ka rah hmabak chu ka han rap leh dawn a, ka ke chuan rah tur a hmu zo ta tlat lo. Ka petek zeuh chauh ni hian ka hre na a, ka petek satliah lo a niang, a thim ta mup mai.

Ramhuai thiante

Chulai step sir tuiluankawrah chuan nikhaw hre lovin eng chen nge ka awm ka hre lo. Ni khaw hre lo han tih lemah, na leh hrehawm engmah ka hre lo a ni mai a. Ka nuam deuh vung vung hian ka hria a. Ka ngaih chu a tha chiah lo. Ruih sual changa ka hmuh thin ramhuai tereuh tê tê, dum deuh deuhho khan dan pangngaiin min rawn bawm leh a. An titi atangin ka thi ang tih an hlau hle tih ka hria, “A zu in thin anga chhia hi hremhmunah pawh a awm lo! Hremhmun hi a tan a tha lutuk a ni! Hremhmun kal tlak khawpa a fit deuh hunah kan la talh dawn nia! Kaitho leh rawh u,” an tih nawk nawk te pawh chu ka hria a.

Ka thi tlat!

Min kaihthawh an tum a, ka harh thei mang si lo va, ka thi ngei dawn niin ka inhria a, sual sim a hun fu mai tih ka ngaihtuah thut a. Mi rilru chak hi ka ni a, sual inhriatna te hi ka nei zung zung thei a. Ka sual chu ka sim hman hlauh chuan vanram te pawh ka beisei ve phak mai dawn a, sual sim tumin ka bei ta thut mai a. Ka ramhuai thiante chuan sual simin ka thi tak tak ang tih chu an hlauh ber a ni a, “Harh teh. Mi tumahin tuiluankawra mu chungin sual an sim ngai lo. Sual chu camping-ah chauh sim tur a lawm. I mawl em mai!” tih pahin ka awmah chuan an nem a. Mahse, a sawt lo, ka inlet thawk a, ka thi ta tlat!

Jakoba Leihlawn

Ka ramhuai thiante chu hmai hupin an tlanbo nghal a; van lam chu vawilehkhatah a lo inhawng ta huau mai a. Hei ngei hi a nih dawn hi sunday sikul-a kan zir thin Jakoba hmuh kha, ka tih lai chuan, ka taksa chu tihdanglama awmin vana lak chhoh ka ni ta puat mai le.

 An speed a chak avang chuan ka sual chu ka sim hman hram a, a dawt leh “Tlanna” tih lam chu ka la chang mumal hman meuh lo niin ka hria.
 

Laklawh laia Chatthla, chutia sual sim deuh roh, piangthar chiang chiah mang si lo, spiritually handicapped category ang renga chhiar theih ka nih laklawh lai taka thleng chho ta thut ka nih avang chuan chunglam pawh chu an lo inring hman lo a ni teh chek ang chu, vanah chuan cleanliness week an lo hmang a, an lo phusa nasa hlawm khawp mai a. thenkhatin nunna thinghnah tla an lo phiat fai a, rangkachak kawtthler te chu an lo phiat khu rum rum mai bawk a.

Han biak lum-lam tur melh pah chuan ka’n hawi vel a, ka piah deuha puan var sin pakhat, “Thisen thisen” tia bang lova riat riat chu ka va bekbawr ta a. A hnenah chuan, “ Ka pu, hei ka awmna hi khawi hmun nge?” ka’n ti ve tawp mai a.
 

Puan var sin chuan, “Ka fapa, mithianghlimte khawpui a nih hi. Lo thleng thar i ni maw?” a ti a. Ka nih thu ka hrilh hnu chuan, ralkhata putar thu, khabehmul var sei tak nei chu min kawhhmuh a, “Ani saw mithianghlim Peter-a a nia, vanram chowkidar hi a nia, a hnenah sawn va kal ta che.” a ti a, “Thisen, thisen...,”  ti zel chung chuan min kalsan ta a.

Tichuan, a kawhna lam chu ka pan phei a. Ka rilru chuan, “Khawvela ka awm laia a chanchin ka hriat thin, gospel camping vela an sawi ban theih loh Peter-a kha a nih dawn hi, kei lah misual awm tha duh lo, rui tlu-hlum ta mai kha ka ni si a, crash course-a ka sual sim kha a pawm loh vaih chuan engtin tak min nghaisa ang maw? A lawm zawng eng nge kan sawi ang aw? E! tak a, sangha mantu a ni tak e! Tura sangha hrai hlawkzia sawipui hlauh teh ang,” tih te ka ngaihtuah mek lai chuan a thutna bul chu ka thleng phei ta a.

Uniform dik lo

Mithianghlim Peter-a chu muangmara a puan var sin bah that pah hian a lo tho va, mi pawh en lem lo hian, “Eng nge ni ta ka fapa?” tiin min lo zawt a. Kei chuan, “Ka pu, sawta mi sawn i hnena kal turin min hrilh a, ‘Ani saw vanram chowkidar a nia,’ a ti che a, ka rawn pan che a ni” ka ti a.

Peter-a chu a sa ta phat mai a, “Mathaia a nih zik zek chu! Vanram chabi ka kawl tak hnu hian a nalh lo zawng hian mi hi a sawi peih hrep mai a. Khandaih, a beng han hlawi hlekna tur han awm se aw! Hmm..eng pawh ni se...” tih pahin min han en chiang a, mak ti takin, “Nang hi eng nge i awmzia? Hei, chabi ka kawl daih si a. Engtin nge helai hmun i lo thlen ve ringawt theih? Puan var pawh i sin si lo!” a ti ta vak mai a.

Kei chu ka han inen chiang a, ka silhfen chu, ka sualna avang chuan senlar ang mai hian a lo sen hlar mai lah tak a, puanvar sin chhiar sen loh zinga mahni chauha sual chhinchhiahna puan sen lar sin chu langsar va va tak ka ni. Chutiang puan sin an la hmuh ngai loh avang chuan mak ti tak mai hian min kil ta tuau tuau mai a.

Inhnialna

Ka chungthu avang chuan an buai ta hle mai a, a thenin “Beramno hmaah hruai tur a ni,” min ti a. A thenin, “Nunna kawngka zim atanga lo lut a ni lo, kan party mi leh sa a nih loh bakah job card pawh a nei lo! Chuvangin leilawtah, tah leh hathialna-ah paih tur,” min ti a.

 A dang leh chuan “Amah hi beram ni lovin kel a nih vangin kelpachal hnenah hlan tur a ni,” min ti bawk a.

“ILP pawh nei lo chunga a lo luh dan hi... kan zingah thamna dawng kan awm a ni!” ti tawk an awm.

“Lehkhabuah a hming a inziah pawhin typing mistake a ni ang!” ti tawk an awm bawk a.  

Kei lah chu ka sualna nasa tak avang chuan sawi tur nei lovin kil khatah ka lo tuai thi nei din reng ringawt a. Chutia rei fe an inhnial hnu chuan ‘Rorelna Lal thutphah’ hma-a ka chungthu rel chu thil dik ber niin an hria a, chu lam chu min panpui an tum ta a ni.

Rorelna leh RV Rakzu

Peter-a chuan, chu khawpui thianghlim lairil lam pan chuan meialh tawlailir-in min hruai ta. Kawng lakah chuan a puan kar atang chuan Ray Ban tarmit dum chhah tak hi a rawn phawrh a. A tangkaina ka hriat lohzia a hmuh veleh, mawl tih hmel deuha min melh pah chuan, “‘Ni ai pawhin i eng zawk,’ tih hlathu te kha i hre ve na nge?” tiin min zawt a. Kan ngaihtuah a, Pathian hla chu ni ngeiin ka hria a, Pathian hla lah hi ka sa khat nasa mai si a, a tawpah chuan ka hrechhuak ve ta hlawl a. “A ni tak, a ni tak, camp chhuah dawn zan velah chuan kan sak dup dup thin tak kha.” tiin ka chhang ta a, Peter-a pawh a thaw huai mai.

Rorelna thutphah bul chu kan thleng ta rup mai le. Angel te, cherub te leh serafim te leh thil nung chi hrang hrang, Animal Planet channel-ah pawh ka la hmuh ngai reng reng lohte chu an lo phu sup sup mai a. “A ropui e, a ropui e.” an lo ti dual dual mai a, a thunawnah “Thianghlim, thianghlim,” an ti chuah chuah mai bawk a, tarmit dum vuah chung pawhin eng nasa tak avang chuan ka meng hlei thei lo chu a ni mai a.

Chutah, tuifinriat ang aw hian “Ka fapa, Khawpuimawi ah hian engtia lo awm ve mai nge maw i nih chu le?” min han ti a, a dawta han dawt zia zang ni tawh hek lo le, RV a ka rakzu in quality chhiat lutuk thu leh, ka luhai ka tluksual vang maia thleng chho ka nih thu chu kan sawi ve ta poh va.

Vanram tithlabartu

Vanrama chengte chuan zu chhe in palh vanga thihna case hrang hrang an lo hre ve tho mai. Mahse, zu quality chu thihpui tham khawpa chhia a ni tih hre reng chunga in chhunzawm zel thin mi ka nih thu ka han hrilh chuan mak an ti takzet a. Thih dawn darkara sual inhriatna nei thut thei khawpa rilru chak ka nihzia ka han hrilh phei chuan mak an ti lehzual a.

Keimah anga rilru chak, keimah anga thih dawn darkara sual sim thut tum tlangval dang tam tak kan khuaah an la awm thu ka han hrilh phei chuan, van khua leh tuite chuan mak hi an ti tak zet a. Chutiang mi chu tihsual palh thil thuah puan var sin miah lovin vanramah kan chho palh thei tih a taka min han hmuh hnu phei chuan an thlabar takzet a. Mak an tih em vangin van chu dar chanve lai a reh ta duk mai a, lei taksa ang chu la nei ila chuan, thin a phu dup dup ang chu.

Ka tan hmun a awm lo

Chutia, ‘Thianghlimna’ hma-a puan sen bat a, Petera Ray Ban tarmit dum vuah a, tuikunluk ang maia ka kun reng lai chuan, khawngaihna tawp ngai lo chuan, “Ka fapa, i hun a la thleng lo ve, khawvela kir leh tur i ni,” a ti ta a. 

Thil awmzia chu ka hrethiam nghal uar a. Sual sim ve deuh roh, chhandam fa ni chiah mang si lote tan hian vanramah hmun a awm lo. Tin, puan var hi vanrama dawn chawp tur a ni lo, lei lam atanga chhawm chhoh tur ni awm tak a ni. Puan var sin chhiarsenloh zinga puan sen sina chatuana awm ve chu hremhmun tluk thovin a hrehawm ang. Kei hi, lei thuam hlip deuh roh, van thuama ka inthuam hman hma chiahin ka thi a lo ni. Thi turin ka la fit lo. “Thi tlak ni turin zuk inla fit leh deuh rawh!” min tihna ang deuh niah ka ngai.

Lei lama ka let leh chuan, zu ka nghei rualin ramhuai dum tereuh tê tê bak kha thian ka nei leh dawn si lo. Thi leh pawh ni ila, tun ang hian vanramah ka kal leh tawh kher awm si lo, tiin ka inngaihtuah a, ka hreh khawp mai a.

 Lei lama lunghnur taka ka han let leh tur chu Lalthutphaha thu chuan min khawngaih ve khawp mai a. “Hetia i lo lan takah chuan, zawhnate pawh min zawh duh i nei ngei ang, khu i lei taksa lah chu an buaipui luih luih mai si a, thi tawhah an ngai che a, chuvangin i kir leh hunah pawh, lei mihringte khuan zawhna tam tak an lo zawt dawn che a ni, mi tlem tê chauh he hmun atang hian an kir leh thin a ni. I thusawite chu inlarna thuah tam takin an pawm dawn a ni” a ti a

Ka zawhnate 

  Chutia min tih takah chuan ka tlangnel ta khawp mai a. Mawl takin, “Lalpa, inthlan dawnah lo chuan inlarna an hmu ngai em ni? Inthlan a zo tawh si a, inlarna thu puanna atan chuan a timing lo..” kan ti dek dek a, Ani chuan, “Mihring, i duh chu min zawt thuai mai rawh!” a ti a, han hnial chi aw zawng a ni ta lo. Eng nge ka zawh ang aw? tih chu ka han ngaihtuah a, zawhna awmze thuk tak nei leh zawhna pawimawh tak hlir zawh ka duh teh lul nen, zawh tur reng reng ka hre ta mang lo va. A lo kal leh hun tur te, Daniala Hapta an tih te hi han zawh fiah deuh awm tak a ni a. Chutih lai tak chuan ka ngaihtuah chhuak zo tlat lo. “Thil mum dik tak, a hmawr zum si i siam thei em?” tihte han zawh ka duh deuh a. A thin ka tihrim leh ka hlau bawk si a.

 Rilrua lo chhuak apiang ka zawt ta ngawt a. “Lalpa, Mizoram atanga lokal ka ni a, Kristian hlang deuh thaw awmna a ni si a, kan ram khu a va rethei ve, malte hi min sawm ve vak lo em ni?” tiin a hmasa ber atan ka’n zawt a, Thukna pui chuan, “In neihsa pawh in hmang thiam hleinem, a dang han beisei zia emaw in nih chu le?” tiin min chhang a, ka dang ang reng fu mai.
 

Zawnchhuah ram...? 

A thawh hnihna atan ti hian kan ti leh a, “Kei vut leh vaivut mai hian ka be pawp ta laklawh si che a, Lalpa, kan ram te khu a va chhengchhe bik ve?” kan ti leh a, Lalberte lalber chuan, “Khu ram khu satharte leh ram chhengchhia-a cheng chi ho ramsate chenna atana ka siam a nih khu, mihring chen nana ka siam a ni hlei nem, in lo chen ve ringawt na chhan khu i hria em? I chik ngai em? Engvangin nge in ram hual vela phaizawlte khu in luah loh? I chhut ngai em?” min ti ta erh mai a. Ka chhut ngam bawk si lo va, chhut mah ila a nihna dik tak ka sawi ngam dawn teuh si lo va, ka kezungpui ka bih ta reng a.

 

Hetiang ngawt chu a dik lovang, mite inlarna leh vanram fan a ropui theih teh reng nen, a thu hrimah inlarnate hi a ropuiin hmuh a har tehlul nen, duh duh a, a pawng a puia hmuh ngawt theih pawh a ni hek lo va, heti ngawt chuan a fel dawn lo, khawnge huaisenna zawng zawng sawm khawmin kan bei leh teh ang ka ti a, ka dak chhuak a, a vawithumna’n ti hian kan ti leh a, “Mahse, Lalpa, i zawnchhuah ram a ni si a...” ka’n ti leh dek dek a, A hming Maka chuan, “Kei a bul leh a tawp, Alpha leh Omega, engkim siamtu leh engkim hretu hian, ram ka zawn khut khut i ring a maw? A mawl pawh i mawl zozai e! Peter, he mihring hi mei leh kâta ka kan raltir hma hian, khawvelah zuk dah leh rawh u” a ti ta a.

 

Tin, heti hi a ni a, angel tituai deuh pawh melh no hman eih lovin, Petera leh vantirhkoh san tha deuh deuh pahnih hian min phih ta nawk nawk mai a, pindan thim leh hing zetah chuan min nam lut ta nawk nawk a. Ka hnungah chuan thir kawngkhar hi a inkhar ri bur a, Chumi rual chuan ka harh zawk a, ka han inen chiang a, Bawngkawn Police lock-up ah chuan ka lo tang fel der tawh a.

 

Ka inlarna hmuh ropui tak chu kan tanpui mawl tak takte bula han sawi chi a ni ta mang si lova, “Ka Ray Ban sunglass... Petera min pek kha tu nge ru?” te ka ti vel ta mai mai a.