Pawisa Thiltihtheihna

Pawisa hian thil a tithei tih hi chu ka hre ve thawkhat viau a, thil chi hrang hrang a tihtheih dan hi a hranpa tak hian ka lo chhut dip dep ngai lem chuang lova.

Vawiin ah, chiang takin pawisa hian thawklehkhat-ah, mihring hi a ti danglam thut thei tih chiang zet maiin ka’n hmuh kha!

Pa pakhat ka va dawr a, a office a ka luh lai te chuan, a  mitsir takngial pawh hian min lo melh vel chin peih lova. Ka awm ve tih hre lo ang hmiah hian a dawhkan a laptop a dah ah chuan Pocket Tank min khel san hmiah hmiah mai a.  Ka hmanhmawh thu ka sawi pawh chuan min la uksak duh der lo mai a.

Amah lah chu, saisu bulthut niawm tak hi a ni roh va, a sam chu a tukhum lamah a khuih pial vun mai bawk a, a hmel chuan hnek hawi sawk zawh chiah; lo hawi let leh lam hmel hi ang deuh ber bawk awm e. Ngeng ngelh ngulh tak a ni.

Ka hmanhmawh avang chuan ka kalchhan leh ka thilduh chu zawh buai ngai lovin ka’n hrilh ve hmiah hmiah mai bawk a, chutah chuan alawm pawisa thiltihtheihna a lo lan tak ni.

An hlawk phahna tur thil a ni tih an hre chiah mai chu, a chair chawp chuan a rawn inher vut a, a hma a Red Indian titau hmel niawm tak pu reng kha, a khik theih dan nasa ber hian a keh ta ver vur mai a, a laptop pawh chu a khup nghal thuai a, a dawhkan chu a rawn bawh hnai a, a mitmeng te chu a nung sur mai. Dawhkan kha kan inkar-ah khan awm lo phei se chuan ka malchuangah a rawn thu thei hial awm e.

A tul ang ang min tihsak zung zung a, chumi pah chuan ka ei leh in tur a chah bawk, a nelawm ta khawp mai a, kar lehlam a a fanu birthday lawmna a tel ve ngei ngei tur te chuan min sawm ta deuh deuh va, over tak  ani.

Ka kalsan hnu chuan ka rilru ah pawisa hian thil a lo va ti thei tak em tih hi a awm ta reng a.