Lehkhachaih Thu

Ka muhil tui lai hi ka phone khur vel chuan min tiharh a, zanlam menrei nen lawm vak lo chuan ka han ban hram a, men pawh meng tha peih lo chuan, ngaihnobei lo fahran hian 'Hello' chu kan ti ve hram a, min rawn chhawntu aw ka hriat meuh chuan ka thu chhuak zawk mai, phur ru ang reng deuh tak chuan ka be chhunzawm ta a.

Ralkhat atang pawhin a aw ringawt pawh hian engtin emaw deuh tak hian min hnen a, ka lungawi ru veng veng mai, thil ropui em em han sawi phei chu kan nei lem hlei lova, i lo haw dawn hnai tawh em? chuti khati a rawn ti kamtha mai a lo ni a, kan inbiak lai chuan an nau mipa naupang lian ve tawh ang reng tak chuan min biak ve a duh thu min hrilh a, kan inbe ta a.

Chu nau chuan thil sawi tur a nei tam lo, thil min chah duh a lo ni a, a thil min chah lah chu ka hriat ngailoh lam tak 'Lehkhachaih' a ni hu mai, lehkhachaih naran a ni lo 'Patang' a nia a rawn ti a, ka hriat chian loh hlau takin min hrilhfiah ta erh a.

Kan inbiak zawh a phone ka dah chu, ka inngaihtuah bial mup mup mai. Ka thlenna hotel hi chu AC a ni ve mial a, room a awm hi chuan boruak lum sa hulh hulh in min ti buai lem lo, mahse pawnlam boruak a han vah chhuah chu ka peihlo ngang mai, dik tak phei chuan ka peih loh em avangin ka tih tur pawimawh thenkhat pawh ka thulh phah hial a ni. In hriat kha Delhi lum vanglai tak khawlai a thil zawng tur a in tirh chhuah ngawt mai chu a peihawm loh full.

Mahse, 'patang ' chu ka hawn si loh chuan ka hawn hunah ka leng duh awm sia, a nau chuan min lo zawt ngei ang, a u te'n an duat rawn , an atchilh rawn a ni roh bawk sia, ka hawn loh vaih chuan a u lakah hian mark score san a har mai pawh ni lo, ka point lo hmuh tawh sa pawh kiam deuh dawk dawn a hriatna ka nei bawk si. Dinhmun a va khirh ve, a tu teh lek chuan nge maw, kan nau-a pawh chu 'patang kite ' te lo hrilh hre reng reng chu ni maw, thil tullo tawp hi enge maw an lo sawi hmawrhmuh thin, hetiang thil hriat zawng zawng sawi zawt zawt hi hi IPC ang zawng te hian hremna dan la siam se a tha ang, ka ngei zawng tak an ni.

Reife ka inkhap hnu chuan, 'khawnge thih leh thih, a u lakah tlaktlumna remchang alawm' ti chungin Delhi khawlum sa hal hulh hulh hmachawn tur chuan ka tho chhuak ta nge nge a.Naupan lai atang a thiltha beisei tur leh a hun ah chuan  tawrhna te pawh hmachawn zel tur a hrilh fin leh , thil reng reng a eng zawng a thlir thiam tur a namen lova zilh, hauh leh vauna te hial pawh lo tawng tawh ngang kha ka ni a, ka thil tih tur pawh chu ka peih emaw peihlo emaw lam dah tha in, chu thil avang a ka tan a thil tha lo thleng tur lam chu ka ngaihtuah lui tlat a, ka hawn hunah ka  'patang lehkhachaih' hawn nen ngat chuan ka va leng ang, a nau chu a lo lawm em em ang, a nau a lawm em avangin a u chuan min ngei hluah hluah lo tawp ang, chuti khawp a a nau lawmzawng ngaithuah peih chuan a lawmzawng tih ka peih dan tur te pawh a ngaituah chhuak ngei ang, nula tan an lawmzawng ti chak ngawih ngawih mipa chu.... aaa.! sawi thui lo zawk ang.

Ti chuan, phur takin hotel atang chuan ka lim chhuak a, khawlum lamin min tibuai phak ta lo, ka ngaihtuahna thinlung lam chuan min hruai a, a vah hian ka vak thuak thuak tawh mai, vai kawngkal te, taxi pute, dawrkai te leh a biak tlak hmel deuh te zawt chawp zelin Old Delhi lam ah ka vak lut ta hial a, chulai a lehkhachaih chu an fak viau hlawm a, an lo ngaisang hrep ni tur a ni, ka rinai daihin an lo hria in min kawhhmuh tu tur ka tawng hnem, lehkhachaih lar tak a lo nih hrep awm chu!

A hmunah chuan lehkhachaih chu a lo tam nangiang mai a,an lo tiang vum hner hnur mai a, uluk em em in a rawng inchawih mawi deuh leh a siam fuh deuh nia ka rin chu ka lei ta a, ti tha inti em em leh hlawhtling inti em em in ka thlenna lamah ka kir pui leh ta vang vang a, tu emaw khan min rawn be leh se aw, ka thil zawn dan vel chipchiar tak a han hrilh ka va chak tak em, nge inti pa deuh takin bul deuh hlekin ' E, kha kha maw, lei tawh e' ka ti chhum deuh vat zawk ang, tih mai mai te  ka’n ngaihtuah kawngtluan pek kha..

Chu lehkhachaih hrep chuan haw kawng a min tibuai nasat zia chu sawi lo law law mai ang, a thleh theih si loh, bag ah a khung ngam bawk si loh, ka keng ka keng ta mai a, a hmelhem palh ang tih hlau reng reng in kawng tluanin ka veng hi a ni ta ber a, engah nge a chhiat palh takin ti a pathum tal a spare ah ka lo leibelh loh, tiin mawl te hi ka inti leh hluah hluah thin a, ka damchhung hian chutiang the hrep chuan lehkhachaih hi ka la veng uluk ngai lo, ka veng leh tawh pawhin ka inring lo ve.

Chutah leh, zin haw tuk zanah ngei mai chuan hmel uang deuh tak leh titha inti rilru veng veng chung chuan a 'changtunu' te inlam ah chuan chalsam hlim vawk khawpin chu lehkhachaih hnungpuak chung chuan ka lim phei a, kawngkhar bulah te chuan a hmelhem em, nalh lo lai leh himlo deuh lai te hi a lo awm palh em, tiin ngun em em in ka'n endik leh te te a, fel lohna liantham ka hmu lo.

'Confi' em em in inchhung ka luh pui a, min lo lawm der ham ham phian a, an mipa naupang lehkhachaih ka hawn ber chu an thenawm ah a lo leng ve a, an va ko haw chawp chuk chuk a, an koh hlan te chuan hmanlai pasaltha ramvak hlawhtling, sa naran nilo, sairam chhhuak hlawhtling ang deuh ah te ka lo inchan rilru a, ka hah hi a damin; chu lehkhachaih avang chuan nasa tak a chawimawi a awm mai tur hian ka lo inkau nasa mai a, ka lei dan leh hawn dan kimchang min zawh paw'n mawi tak leh ropui tak a sawi dan tur te ka lo ngaihtuah fel thlipthlep a. Nun hi a va nuam em...

Chutah an nau chu a lo haw a, kha le i lehkhachaih chu 'patang' dik tak a nih hi tiin, chhuang ru deuh takin ka lo pe ta ngei a. A la a, a en vung vung a, a lek kual a, a hnunglam a en a, a hmalam a en leh a... A pa lam a hawi a,' Hetiang ka duh lo, a vai em mai' tih leh chhuat a paih a rual ta a.

Ngawi tak rawh nauhai, i chhungte hmuh loh hlanin ka pen dawn chiang lutuk ringawt che...