Darthlalang

Darthlalang a tuihu chu ka hai fai a, pa pakhat hian min lo melh reng mai, chiang em em maiin ka mitah tak min lo en a, ngawi rengin kan in melh ta.

He pa hi ka hriat tawh thin a ni. Mipa naupang mai a nih laiin an hruai a, hmun pakhat ah an dah a, chutah chuan ruler leh lehkhabu kawmdum a awm. Chung thil pahnih hmang chuan thil tam tak an lo zirtir a, a ngaihdan leh duhdan te a hmuh leh a hriatdan tam tak te chu ruler leh lehkhabu hmang chuan an paih thlak sak a, chung thil pahnih hmang chuan dik leh dik lo te, tha leh tha lo te pawh thliar a teh thin turin an zirtir tlat a, hla tak a lawmman duhawm tak chu an khawh hmuh ta a.

Chu lawmman duhawm tak chu la turin an tir chhuak ta a, hla tak a lawmman la tur chuan theihtawp chhuah a tlan zel turin an fuih a, chu lawmman chu a damchhan leh a pianchhan ni hial awmin an hrilh a. 

Tichuan, theihtawp chhuahin lawmman lak tum chuan a tlan ta a, a tlu a, a bawksawp a, a inhliam a, a duhzawng leh ngainat zawng te pawh a kalsan zel a, ruler leh lehkhabu chu hmanrua ah hmangin thi leh thau pawlhin a bei ta chiam a, a tawp ah chuan lawmman chu a va hnaihchilh ta a.

Chu lawmman hlu em em leh ropui em em a an sawi chu a ban a, a kutin a chawikang ta a. Hah tak leh theihtawp chhuah a a lak a nih avangin a hlut hle a, lawm takin a awmah a pawm bet a, hlim em em in a nui chhuak ta hial a, rei tak chutia a lawmman a pawm beh hnu chuan  a lawmman chu enchian tumin a han bih hnai ta a, a kut ah chuan a mawina te chu a da zo ta mai a, a lawmman lak ‘hlu tak leh ropui tak’ ti a an hrilh thin, theih tawp chhuah a; a lak ngei chu a ken lai reng chuan a mawih a, a tla darh zo ta a, thli a lo thaw a, a len bo zo ta. Thudik ziktluak lo leh zirtirna famkim lo a dawng a ni tih a in hrechhuak ta a.

Lawmman latu chu a khua a har ta em em a, a bul tanna leh a kalkawng te chu a thlir kir a, a hmanrua ruler leh lehkhabu te pawh chu a bih chiang a, hrilhhai takin kal lehna tur hre lovin a ding ta reng a. kalsual nia inhriatna a nei a, a kalsualna lai hriatchhuah tumin a hawikir a, mahse a mittui avangin a khawhmuh a fiah thei lo.

Min melh rengtu chu ngun leh zualin ka bih a, mihring ruak leh kawrawng mai ka hmu a, a mihring nihna tak pawh chu a zirchhuah finna te, hawihawmna leh a behbawm chuan a khuh pil bo zo tawh a, ngun lehzualin ka bih a, a mitmengah chuan beiseina eng tlem ka hmu a, chu eng te reuh te chu chem alh chuak zo tak maw?

Ngawi rengin hmuihmul pawh met ta lo chuan darthlalang chu ka kalsan ta a.